Jobbar fram morgondagens helsetenester

Alrek helseklynge skal stå klart først om to år, men samarbeidspartnarane har allereie hatt to workshops om den framtidige helseklynga. INTRO-prosjektet, som introduksjonsopplegget heiter, skal bidra til at Alrek i framtida vil skape nye helse- og omsorgsløysingar i primærhelsetenesta.

Før bygget er på plass skal både studentar, forskarar, pårørande, tilsette og brukarar i Bergen kommune delta i fleire workshops, der dei kjem med idear til tverrfagleg samarbeid og innovative løysingar. Også representantar frå næringslivet har deltatt.

Fått 75.000 kroner

Det er HVL-forskar Liv Jorunn Solstad ved Senter for omsorgsforskning som er hovudorganisator av workshopene, og har fått 75.000 kroner til samhandlingsprosjektet.

- Workshopen i dag handlar om korleis kommunen skal kommunisere helse- og omsorgstenestene sine. Brukarane treng informasjon om tenestene. Difor ser vi på både form og innhald i tenestene. Målet er at flest moglege perspektiv kjem inn i utforminga, seier ho.

Speed-dating om helse

Gruppene får caseoppgåver der dei til dømes skal finne ut korleis ein sjuk mann skal få informasjonen han treng for å får hjelp. Gruppe D foreslår ein pasientkoordinator, mens andre har idéar som går på velferdsteknologi.

Gruppene har også hatt «speed-dating» for å kome fram til ulike perspektiv.

- Alle sit på forskjellige behov. Vi må samarbeide for å se på moglegheitene – kva kan vi få til? Slik kan vi dra i gong samtalane på førehand.

Alrek trengst

Alrek skal handle om forsking, kompetanse, utvikling og samarbeid. Målet er å ta tak i folkehelseutfordringane dei kommande åra.

- Det finst mange typar klynger, men det som skil Alrek ut, er alle dei tunge aktørane som er involvert. Samarbeidet må vere praksisnært, seier Linda Book Dalsgård, prosjektleiar i Smart omsorg i Bergen kommune.

Janne Forthun er masterstudent i farmasi og har deltatt på dagens workshop. Ho meiner at Alrek er heilt nødvendig.

- Det er eit stort behov for å samle informasjonen på ein plass, fordi mange stadar har uoversiktleg informasjon til brukarar og pasientar, seier ho.

Les meir om Alrek helseklynge her.

Fakta:

• INTRO-prosjektet er eit opplegg for å gje studentar, forskarar, pasientar og pårørande eit felles innblikk i helse- og omsorgssektoren i Bergen kommune.
• Samarbeidspartnarane i INTRO er Senter for omsorgsforskning vest/ Høgskulen på Vestlandet, IGS-UiB, USHT og Bergen kommune.
• Alrek helseklynge (ferdigstilt 2020) skal skape nye helse- og omsorgsløysingar i primærhelsetenestene ved hjelp av tverrfagleg og framtidsretta forsking og utdanning.
• Dei offisielle samarbeidspartnarane er Bergen kommune (byrådsavdeling for helse og omsorg), Haraldsplass Diakonale sykehus, Helse Bergen, HVL, Uni Research og Universitetet i Bergen.