HVL skal bidra til teknologiutvikling i havnæringane

Globalisering og klimautfordringar kombinert med rivande teknologisk utvikling endrar norsk næringsliv. Det blir tatt i bruk nye materiale, og prosessar vert endra, automatisert og digitalisert. Mange verksemder har behov for å teste ut nye idear og løysingar i utviklingsarbeidet sitt.

Koplar forsking, utdanning og næringsliv

Norsk katapult er ei ordning som skal bidra til etablering og utvikling av nasjonale fleirbrukssenter til nytte for norsk næringsliv, såkalla katapultsenter. Sentra tilbyr utstyr, fasilitetar og kompetanse for å teste, simulere eller visualisere teknologi, komponentar, produkt, løysingar, tenester og prosessar.

Målgruppa er særleg små og mellomstore bedrifter over heile landet, men også større bedrifter og forskings- og utviklingsmiljø.

- Den nye havsatsinga gjer at Hordaland får ein viktig posisjon i utviklinga av havnæringa nasjonalt, og gir høgskulen gode moglegheiter til å kople vår forsking og utdanning på nye og spanande prosjekt i samarbeid med næringslivet, seier prodekan for innovasjon ved HVL Jens Kristian Fosse.

Det eine senteret blir etablert av Bergen Teknologioverføring i nært samarbeid med fleire aktørar på Marineholmen i Bergen. Det andre vil ligge på Stord der NCE Maritime Clean Tech i samarbeid med fleire aktørar står bak satsinga.

Dette er dei nye testsentra:

• Ocean Innovation Norwegian Catapult Centre i Bergen skal vere eit nasjonalt senter med fokus på utvikling av nye løysingar for vekst og grøn omstilling i havnæringane. Katapult-senteret vil teste nye løysingar innan for eksempel petroleum, matproduksjon og fornybar energi. Det blir etablert av Bergen Teknologioverføring (BTO) i nært samarbeid med fleire store aktørar og næringsklynger.
  
  
• Sustainable Maritime Norwegian Catapult Centre på Stord skal være eit nasjonalt senter innan ulike typar energisystem som batteri, brenselsceller og hybride system til havnæringane og relatert industri. Dei tar utgangspunkt i «det grøne skiftet», eit område kor dei allereie har etablert mykje kompetanse og kapasitet. Bak satsinga står klynga NCE Maritime Clean Tech, i samarbeid med flere leiande forskingsmiljø.