Lagar e-læringsmateriale om mammografi

– Tidleg diagnose har betyding for overleving og livskvalitet til kvinner som lever med brystkreft. Det er viktig at utdanningsinstitusjonar vektlegg og styrker kompetansen innan mammografi slik at ein bidrar positivt til tidleg diagnostikk av brystkreft, seier høgskulelektor Bergliot Strøm. 

Strøm er ein av HVL sine representantar i Erasmus+ prosjektet «Education and training in early detection of breast cancer for health care professionals» (EBreast). Dette prosjektet har som oppgåve å utarbeide eit omfattande e-læringsmateriale på bachelornivå for fleire helseprofesjonar om mammografi.  

Prosjektet skal munne ut i tre opplæringspakker. Ein modul som fokuserer på utviklinga av felles forståing av tidleg brystkreftdeteksjon blant helsepersonell og to moduler som skal fremme kompetansen om tidleg oppdaging av brystkreft blant diagnostisk helsepersonell som radiografar og biomedisinske laboratorieforskarar.   

Lik opplæring og behandling i heile Europa 

Brystkreftdeteksjon bør utførast av eit team av helsepersonell frå forskjellige medisinske fagfelt, som har fått spesialisert opplæring om brystkreft utover grunnutdanninga deira. Det viser seg at det er stor variasjon i denne typen utdanning, sjølv i høgt utvikla europeiske land. Målet med prosjektet er å auke kompetansen når det gjeld tidleg diagnostisering av brystkreft og kvaliteten på diagnostisk prosedyre blant helsepersonell, studentar og lærarar innan fagfelta. Gjennom e-læringsprosjektet skal ein kunne tilby lik opplæring for alle.  

– Vi vil lage kunnskapsbasert e-lærings materiale for helseprofesjonar som på ulike måtar er involverte i mammografiprogrammer rundt om i Europa. E-læringsmateriale skal vere fritt tilgjengeleg slik at utdanningsinstitusjonane kan lage eigne krav og testar. Målgruppene er i stor grad radiografar, bioingeniørar og sjukepleiarar men e-læringsmateriale er også av interesse for andre, fortel Strøm. 

Arbeidsseminar i Bergen 

Torsdag og fredag denne veka er det HVL og campus Kronstad som er vertskap når samarbeidspartnerane frå Finland, Portugal, Sveits og Estland skal møtast.  

– No skal vi arbeide med evaluering og kvalitetssikring av den første e-lærings modulen, seier Bergliot Strøm. 
– Arbeidet vidare blir å ta fatt på den e-læringsmodulen som vi her ved HVL har ansvar for. Den omhandlar dei nyaste og meir avanserte teknologiske modalitetane som er i bruk for å oppdage og individrette ein tidleg brystkreftdiagnostikk, legg Strøm til. 

Fakta om EBreast prosjektet: 

• Prosjektet starta opp i september 2015 og skal avsluttast i september 2018.  
• Prosjektet er tildelt 295.000,- EURO, der ca. 35.200,-  EURO av desse går til HVL. 
• Samarbeidspartnerane i prosjektet er:
  o   Helsinki Metropolia University of Applied Sciences
  o   Finnish Centre for Radiation and Nuclear Safety
  o   University of Aplied Sciences and Arts Western Switzerland
  o   Western Norway University of Applied Science
  o   Oulu University of Applied Sciences
  o   Lisbon Polytechnic Institute
  o   Oulu University Hospital 

• Les meir om prosjektet på hvl.no/collaboration eller på EBreastproject