Beheld regional utvikling i utlysinga av prorektorstillinga
HVL skal lyse ut og tilsetje i fire åremålsstillingar no i vår; to dekanstillingar og to prorektorstillingar. I dag diskuterte høgskulestyret ansvarsområde og mynde for stillingane. For den såkalla tredje prorektorrolla vedtok styret at regional utvikling kjem inn i stillingsnemninga.
Årets første styremøte hadde fleire saker på kartet. Mest tid gjekk med til å handsame saka om «prorektor og dekan 2025 – 2029 – ansvarsområde og mynde». Det var særleg ansvarsområdet til den tredje prorektorrolla som blei debattert. Eit samla styre ville ha regional utvikling tydeleg inn i stillingsnemninga og meir fram i sjølve innleiinga av stillingsomtalen.
Når det gjeld stillingsnemninga vil og omgrepet nyskaping eller innovasjon bli ein del av tittelen.
I nemnte sak var det ei brei omtale av ansvarsområda som ligg til stillingane. Særleg plasseringa av prosjektet for den nye universitetsalliansen Artemis blei diskutert. Prosjektet var i sakspapira lagt som eit ansvarsområde til den tredje prorektorrolla. Grunngjevinga var å kople det nærare regional utvikling og nyskapingsarbeidet. Etter diskusjonen i styret blei prosjektet verande i ansvarsområdet til prorektor for forsking.
Desse fire åremålsstillingane vert no lyst ut med søknadsfrist 9. mars og planlagt tilsetting i styremøtet 24. april:
- Prorektor for utdanning
- Prorektor for nyskaping/innovasjon
og regional utvikling
- Dekan for Fakultet for lærarutdanning, kultur og idrett
- Dekan for Fakultet for helse- og sosialvitskap
Den andre saka som fekk mykje merksemd var «tidslinje for vurdering av medverknad i HVL og styringsmodell i fakulteta». Her var det ulike perspektiv i styret på framdrift og tidslinje, og då særleg knytt til styringsmodell i fakulteta. Styret landa på å sende saka tilbake til rektor for å få ei ny vurdering ut frå styret sine innspel, mellom anna om deler av utgreiingsarbeidet kring styringsmodell i fakulteta kan i gangsetjast raskare.
Styret handsama og fleire saker knytt til verksemdsstyring i møtet; både styrets fråsegn i årsrapport for 2024, årsplan for internrevisjon, bruk av styringsparameter i verksemdsstyringa og tildelingsbrev 2025.
