Viktig signal om fleircampus

Forslaget til årets statsbudsjett som Regjeringa la fram i dag er meint å styrke fleircampusinstitusjonar med eit langvarig geografisk nærvær.

– Det er ein bra start. Eit gjennomslag for oss. Samstundes er dette eit budsjett som fortel at åra som står framfor oss blir meir krevjande. Me må framleis arbeide med å omstille og prioritere godt, seier rektor Gunnar Yttri ved Høgskulen på Vestlandet.

Nye studieplassar innan digitalisering

I dag la Regjeringa fram forslag til Statsbudsjettet for 2024. Høgskulen på Vestlandet får ei samla løyving på 2,45 milliardar kroner.

Bak tala ligg nokre fine signal med 10 nye studieplassar innan IKT, auka merksemd og ei tydelegare løyving til fleircampusinstitusjonar.

– Det er eit viktig signal og ein god start når Regjeringa styrkar institusjonar med fleircampusstruktur. Og nye studieplassar innan digitalisering er viktig for oss og arbeidslivet rundt oss, seier Yttri.

- Men me kunne nok tenkt oss fleire nye studieplassar og ein enda tydelegare og djervare satsing med meir friske midlar til fleircampusinstitusjonar og vår type institusjon. 

Ikkje friske midlar

Yttri fortel at løyvinga til fleircampus baserer seg på kutt, nedtrekk, omfordeling og omdisponeringar frå Regjeringa si side. Noko alle universitet og høgskular får.

– På eit vis er me med og finansierer denne løyvinga og dei andre av Regjeringa sine satsingar i vår sektor. Det er greitt å merke seg. Dette er ikkje nye friske midlar som me kunne tenkt oss.

Han peikar på for HVL sin del utgjer dette nedtrekket 22,6 millionar kroner.

- I tillegg får me eit ytterlegare nedtrekk av studieplassar og rekrutteringsstillingar som me fekk under koronaperioden. Dette utgjer veldig mykje midlar.

- Så om framlegget til statsbudsjettet kan verke bra på overflaten, så vil det medføre konsekvensar for oss.

Sviktane rekruttering til samfunnsberande utdanningar

Yttri påpekar at HVL tilbyr viktige og store samfunnsberande utdanningar innan lærar, barnehagelærar, og sjukepleie som no opplever sviktande rekruttering.

– Me veit at me vil vera utsett for svingingar i år som kjem og det vil utfordre oss. Dette vil gi oss mindre inntekter framover. Det nye finansieringssystemet peikar og i den retninga. Det betyr at arbeidet med omstilling og god budsjettstyring ikkje blir mindre viktig.

- Her skal me prioritere godt og arbeide for at det nye Universitet på Vestlandet også styrkar seg, avsluttar Yttri. 

Fakta om Høgskulen på Vestlandet

• Høgskulen på Vestlandet (HVL) er ein av dei største utdanningsinstitusjonane i landet, med om lag 17.000 studentar. Kvart år uteksaminerer vi 3000 kandidatar som er med på å løyse viktige samfunnsoppgåver. 
• HVL har sterke og innovative fagmiljø innan helse- og sosialvitskap, ingeniør- og maritime utdanningar, lærar-, kultur- og idrettsfag, natur- og samfunnsvitskap, og økonomi og leiing. 
• Den overordna ambisjonen vår er å bli eit universitet med ein tydeleg profesjons- og arbeidslivsretta profil. 
• Vi har fem campusar på Vestlandet: Førde, Sogndal, Bergen, Stord og Haugesund.