Støttar ikkje forslaget om innføring av internasjonal studieavgift
HVL støttar ikkje forslaget om innføring av studieavgift for studentar utanfor EØS og Sveits. Det kjem fram i høyringsinnspelet som er sendt Kunnskapdepartementet.
Denne hausten har debatten gått høgt om Regjeringa sitt framlegg i å endre universitets- og høgskulelova og opne for innføring av studieavgift for studentar utanfor EØS og Sveits. Det konkrete forslaget er å innføre ei studieavgift frå hausten 2023.
HVL skriv i sitt høyringssvar at det må gjerast ei breiare vurdering.
– Dette er ikkje tida for å begrense internasjonal mobilitet
Forslaget inneber ei prinsipiell endring knytt til gratisprinsippet, og Høgskulen på Vestlandet meiner Kunnskapsdepartementet, Utanriksdepartementet og andre delar av offentleg sektor må gjera ei felles vurdering av verkemidla for å fremme internasjonalt samarbeid, mobilitet og solidaritet før dette tiltaket eventuelt blir iverksett. Dette er ikkje tida for å begrense internasjonal mobilitet og samarbeid mellom Norge og særleg land utanfor EØS/EU-området.
Det mest nærliggande er å vise til FN sitt bærekraftsmål nr 4 : ‘Sikre inkluderande og rettferdig kvalitetsutdanning for alle, og fremme livslang læring’. Høgskulen på Vestlandet sin visjon er ‘Kunnskap som byggjer menneske og samfunn’, og som også inneber at vi vil ta del i ansvaret for den samla samfunnsutviklinga.
Fleire uavklarte spørsmål
Den ekstreme klimasituasjonen, demografiske endringar, pandemi, konflikt, tap av fridom, mattryggleik og energisituasjonen er alle gode eksempel på at vi må ha ei forståing som strekkjer seg lenger enn EØS. HVL vil poengtere at internasjonalisering, med spesielt tredjeland, har langt større og viktigare betydning enn å prinsipielt skape økonomiske og kulturelle forbindelsar til Norge slik det blir ytra i høyringsnotatet.
Om forslaget blir iverksett, så er det fleire uavklarte spørsmål kring stipend, søknadsbehandling av fritak, tekniske løysingar og informasjon til potensielle studentar som tilseier at ei innføring hausten 2023 er for snart.
HVL ber om at joint masterprogram blir vurdert unntatt ordninga dersom samarbeidspart ikkje opererer med studieavgift.