Arbeids- og kompetanseområde
Eg er prosjektleiar for Nasjonalt prosjekt for lærerrekruttering. Prosjektet har som mål at fleire søkjer lærarutdanning og startar i yrket, og at det er eit større mangfald blant lærarar i barnehage og skule.
Nasjonal prosjekt for lærerrekruttering er finansiert av Kunnskapsdepartementet, og me samarbeider tett med lærarutdanningsinstitusjonar, barnehage- og skuleeigarar og arbeidstakarorganisasjonar. Arbeidet er forankra i Strategi for rekruttering til lærerutdanningene og læreryrket 2024–2030.
Arbeidsoppgåvene mine som prosjektleiar:
- Leie og sikre framdrift i prosjektet
- Utvikle og styrke kunnskapsgrunnlaget for rekruttering til lærarutdanning og for å behalde lærarar
- Vidareutvikle samarbeidet med relevante samarbeidspartar
- Bidra til synergiar mellom nasjonale og regionale tiltak
- Sakshandsaming, rapportering og formidlingsarbeid
Prosjektnettsida Samarbeid om lærerrekruttering rettar seg mot utdanningsinstitusjonar og samarbeidspartar, og i tillegg brukar me kampanjenettsida Bli lærer – Inspirer og gjør en forskjell for fremtiden! i kommunikasjon med målgrupper for utdanninga.
Utdanninga mi er master i organisasjon og leiing - utdanningsleiing. Eg har vore tilsett i høgskulen sidan 2013, og har hatt ulike stillingar knytt til prosjektleiing, leiarstøtte, organisasjonsutvikling, sakshandsaming, samfunnskontakt, livslang læring. Frå før av har eg 16 års erfaring som lærar i grunnskulen.
