Sandra Borch besøkte HVL campus Førde

Høgskulen på Vestlandet ba i oktober Kunnskapsdepartementet om dispensasjon frå karakterkrav i matte og norsk for sjukepleiestudentar. I dag var dispensasjonssøkanden eit av fleire viktige tema då forsking- og høgare utdanningsminister Sandra Borch besøkte Høgskulen på Vestlandet i Førde. 

Statsråden påpeika at fleire har spelt inn ønskje om endringar i krava for å kome inn på sjukepleiestudiet. 

Kjem melding om opptakssystemet

– Det er ingen tvil om at eg som minister er villig til å vurdere dispensasjon frå karakterkrava. Vi skal levere ei profesjonsmelding no til våren, og ei melding om opptakssystemet, der dette kjem til å bli sentrale tema, sa Borch. 

I møtet onsdag 1. november fortalte Randi Skår, dekan ved Fakultet for helse- og sosialvitskap om Høgskulen på Vestlandet sine utdanningstilbod innan sjukepleie både på bachelor-, master- og ph.d.-nivå. 

Ei av landets største sjukepleiarutdanningar

HVL har ei av landets største sjukepleiarutdanningar, og kvart år utdannar høgskulen over 500 nye sjukepleiarar som er klare til å gå ut i arbeidslivet. Men som dekanen påpeikar: Talet kunne vore høgare.

Dersom kravet var generell studiekompetanse, slik det var før 2019, ville 125 fleire vore kvalifisert til å byrje på sjukepleie ved HVL i 2023. 

– Nedgangen i rekruttering til bachelor på sjukepleie bekymrar både oss og kommunar i regionen som slit med å rekruttere sjukepleiarar til sine helsetenester. Vi må ta grep no, og det er difor positivt at statsråden kjem hit til Førde for å lytte, sa Skår.

Dekanane Randi Skår og Jens Kristian Fosse tok opp problemstillingar knytt til helse- og ingeniørutdanningar for statsråd Sandra Borch i Førde i dag.

Robotar og menneske = sant 

Unders dagens besøk vart også dei viktige utdanningane innan automatisering, bygg, elkraft og informasjonsteknologi løfta fram. Dekan ved Fakultet for ingeniør- og naturvitskap Jens Kristian Fosse trekte også fram Studentjobb Førde som ein viktig arena for å få studentar ut i relevant arbeid. 

Sjølve møtet gjekk føre seg i Robotikklabben på campus Førde der også moglegheiene innan e-helse og helseteknologi vart løfta. 

Besøket blei avslutta med ein presentasjon av Jobjørn Myen. Han studerer informasjonsteknologi ved HVL og fekk vist korleis dei mjuke og vennlege robotane er spesialdesigna for å kunne samarbeide med menneske.