Studieplan - Årsstudium i administrasjon og leiing

Studiet gir deg kunnskap og evner som blir krevd av leiarar i dagens arbeidsliv, med stort krav til omstilling og effektivitet. Studiet gir ei god forståing for utfordringar og moglegheiter innan leiande arbeid.

Årsstudium i administrasjon og leiing passar både for deg som ønsker å ta dei første skritta i retning av å bli leiar, og også for deg som allereie er leiar, men ønsker å formalisere arbeidserfaringa di.

Studiet er ei heilskapleg leiarutdanning som baserer seg på forsking og sentrale teoriar innan ulike fagområde. Gjennom studiet lærer du korleis du påverkar kvaliteten på arbeidet medarbeidarane gjer, og korleis du best bidrar til å styrke konkurransekrafta i eiga bedrift.

For deg som ønsker ein bachelorgrad i økonomi og administrasjon ved Høgskulen på Vestlandet vil årsstudiet kunne inngå som 60 av 180 studiepoeng i bachelorgraden.

Læringsutbytte

Kunnskapar

Etter å ha fullført årsstudiet har studenten kunnskap om:

• teoriar om korleis organisasjonar er bygde opp, korleis dei fungerer, og korleis ein kan bidra til å vidareutvikle og omstille ein organisasjon
• personalleiing og personalutvikling
• problemstillingar knytte til psykologi i organisasjon og leiing
• korleis verksemder driv aktivitet på ein etisk forsvarleg måte slik at dei ivaretek interessentane sine og samtidig fremjar FN sine berekraftsmål
• digitale arbeidsformer i organisasjonar
• korleis marknaden fungerer, korleis konsumentar og produsentar gjer vala sine, og korleis desse vert påverka av omgjevnadene
• sentrale tema innanfor verksemdsstrategi og tilhøyrande prosessar og strategiske avgjerder

Ferdigheiter

Etter å ha fullført årsstudiet kan studenten:

• identifisere, analysere og reflektere over problemstillingar innan administrasjon og leiing både på individ-, gruppe- og organisasjonsnivå
• kommunisere innhaldet i analysar, metodeval, resultat og føresetnader både munnleg og skriftleg
• hente inn, sortere og vurdere relevant informasjon og løyse praktiske problemstillingar innan området administrasjon og leiing generelt, og knytt til kvart av dei ulike emna i årsstudiet spesielt
• bidra til å integrere ansvarlegheit og berekraftshensyn i forretningsmodellen og praksisen til verksemder

Generell kompetanse

Etter å ha fullført årsstudiet har studenten:

• kunnskap om relevante fag- og yrkesetiske problemstillingar innan organisasjon og leiing
• evne til å presentere sentrale leiingsteoriar, organisatoriske problemstillingar og løysingar skriftleg
• evne til ansvarlegheit, kritisk tenking og etisk refleksjon

Innhald

Studiet er eit fulltidsstudium. Nokon av emna kan vere baserte på samlingsbasert undervisning. For enkelte av emna kan delar av innhaldet vere digitalt presentert, men hovudvekta av undervisning og samlingar vil vere fysisk på campus Haugesund.

Studiet inkluderer ei brei samansetning av administrative fag som leiing, organisasjonsteori, marknadsføring og føretaksstrategi.

Arbeidsformer

Vi tilbyr førelesingar, diskusjonar og seminar på campus Haugesund. Studentane arbeider med oppgåver både individuelt og i grupper.

Vurderingsformer

Ulike vurderingsformer vert nytta i dei enkelte emna. Sjå skildringa av dei enkelte emna for nøyaktig informasjon om kva vurderingsform som er vald.

Internasjonalisering

Nei