DKB801 Digital kompetanse i barnehagen

Innhald og oppbygging

Vidareutdanninga Digital kompetanse i barnehagen legg opp til ei leiken, undrande og utforskande tilnærming til bruk av digitale verktøy i det pedagogisk arbeidet. Studiet er på masternivå. Dette er eit studietilbod i praktisk og didaktisk bruk av ulike typar teknologi i pedagogisk arbeid for og med barn, og har som mål å utvikle barnehagelærarar sine profesjonsfaglege digitale ferdigheiter. Studiet gir spesialisert fagdidaktisk kunnskap om digitale verktøy, og stor variasjon i innhald og oppgåver for å tangere fleire ulike fagområde i barnehagen. Studentar får opplæring i eit utval av digitale verktøy som både kan brukast av tilsette i barnehagen for å skape eit miljø for leik og læring, og som barna kan bruke for å uttrykke seg og leike. Undervisninga og praktisk arbeid på eigen arbeidsstad skal konkretisere rammeplanen sitt føremål om digital praksis i fleire ulike fagområde.

Studiet startar med fordjuping innan profesjonsfagleg digital kompetanse og refleksjon over etiske dilemma og digital dømekraft. For å fremje det tverrfaglege potensialet i ulike konkrete digitale verktøy og arbeidsmåtar, skal kvar av dei utforskast i lys av fleire ulike fagområde. Disse arbeidsmåtane og verktøya kan inkludere digital forteljing, podkast, programmering, foto- og video-behandling, animasjon og digital musikkskaping. Arbeidsmåten i studiet gir studentane praktisk erfaring med refleksiv praksis.

Innhald:

• Forståing av relevante omgrep som digital dømmekraft, digital praksis, digital kompetanse og barns gryande digitale dømmekraft
• Innsikt og kjennskap til relevante teoretiske perspektiv innan digital praksis og digital kompetanse i barnehagen
• Opparbeide kunnskap om personvern, informasjonstryggleik, opphavsrett, kjeldekritikk og tenleg bruk av digital teknologi i barnehagen.
• Barns leik og mediekultur
• Kunnskap og ferdigheiter i korleis ta i bruk digitale verktøy i det pedagogiske arbeidet i barnehagen
• Erfaring med å legge til rette for pedagogiske leik- og læringsaktivitetar som inkluderer digitale verktøy
• Kunnskap om å bruke digitale verktøy for å arbeide med dokumentering og vurdering i barnehagen

Læringsutbytte

Ved fullført emne skal studenten ha følgende læringsutbytte:

Kunnskap

Studenten

• har inngåande kunnskap og teoretiske perspektiv innan digital praksis og digital kompetanse i barnehagen
• har omfattande forståing av digital dømmekraft, digital praksis og barnehagelærar sin profesjonsfaglege digitale kompetanse
• har inngåande kunnskap om barn sin leik, mediekultur og digitale dømmekraft
• har kunnskap om personvern, informasjonstryggleik, kjeldekritikk, opphavsrett, universell utforming og teneleg bruk av digital teknologi i barnehagen
• har spesialisert fagdidaktisk kunnskap om ulike digitale verktøy og bruken av dei

Ferdigheiter

Studenten

• kan utforme faglege og pedagogiske aktivitetar i barnehagen som kombinerer digitale verktøy med analoge materiale i ein heilskap som stimulerer barns utforsking, leik og læring
• kan bruke og vurdere digitale verktøy for å arbeide med dokumentering og vurdering av det pedagogiske arbeidet barnehagen
• kan nytte og vurdere pedagogisk programvare og spel retta mot barn for å nå pedagogiske mål
• kan spesialisere eigen profesjonsfaglege digital kompetanse
• kan lage medieproduksjonar åleine og saman med barn

Generell kompetanse

Studenten

• kan sjå teknologi som eit verktøy som har verdi i arbeid med barn
• kan utvikle, leie og vurdere pedagogiske leik- og læringsaktivitetar som inkluderer digitale verktøy
• bidrar med individuell og kollektiv kompetanseutvikling på eigen arbeidsplass
• kan forholde seg kritisk og reflektert til bruk og innhold av digitale verktøy og programvare
• kan rettleie og leie barn, føresette og tilsette i deira møte med digital teknologi i og utanfor barnehagen.

Krav til forkunnskapar

Ingen

Undervisnings- og læringsformer

Tilbodet er ein del av satsinga Kompetanse for framtidas barnehage og går over to semester som eit reint nettbasert studium. Studiet inkluderer både sjølvstendig arbeid og gruppearbeid, der nettbaserte ressursar og digitale verktøy legg grunnlag for asynkron undervisning. Dette vert supplert med nettsamlingar i form av temabaserte webinar, digitale verkstadar og rettleiing.

Opplegget er strukturert med asynkront lærestoff og øvingsoppgåver, og stiller krav til sjølvstendig arbeid, aktiv deltaking i problemløysing og kunnskapsutvikling. Studentane skal også søkje samarbeid med andre deltakarar og kollegaer på arbeidsplassen.

Studiet legg vekt på varierte læringsformer, som asynkrone forelesingar, webinar, diskusjonar, øvingsoppgåver, utprøving av oppgåver saman med barn, prosjektarbeid, studentpresentasjonar og arbeid i basisgrupper.

Du vil få ei grundig innføring i bruken av Høgskulen på Vestlandet sin digitale infrastruktur, inkludert læringsplattforma Canvas og medieplattformer som Panopto og Zoom.

For sjølvstendig arbeid og utprøving ynskjer vi at du har tilgang til nokre spesifikke digitale verktøy i din barnehage.  

Obligatorisk læringsaktivitet

For å sikre progresjon og måloppnåing, må studentane gjennomføre tre obligatoriske læringsaktivitetar:

1. Deltaking på synkrone nettsamlingar: Studentane skal vere til stades og aktivt delta på dei digitale samlingane om lag ein dag pr. med.
2. Fem individuelle arbeid som presenteres på nettsamlingane.
3. Prosjektarbeid på eigen arbeidsstad: Studentane skal planleggje og gjennomføre eit prosjektarbeid i eigen barnehage som inkluderer bruk av digitale verktøy. Dette arbeidet krev obligatorisk rettleiing frå faglærar i forkant.

Dei obligatoriske læringsaktivitetane må vere godkjende av emneansvarleg seinast 2 veker før studenten kan framstille seg til eksamen. Dersom ein obligatorisk læringsaktivitet blir vurdert som ikkje godkjend, skal det bli gitt ei grunngjeving for dette. Studentar som ikkje får godkjend ein obligatorisk læringsaktivitet vil - så langt det let seg gjere innan fastsette fristar - få eit nytt forsøk i inneverande semester.

Dei obligatoriske læringsaktivitetane er direkte knytte til læringsutbytta i emnet og legg grunnlag for mappevurderinga.

Vurderingsform

Mappevurdering som består av tre mappeelement:

• Mappelement 1 er knytt til studenten sine praktiske digitale ferdigheiter og produkt (vekting 30%).
• Mappeelement 2 er ein prosjektrapport som viser studenten sin evne til å bruke profesjonsfagleg digital kompetanse til å utvikle, gjennomføre og evaluere pedagogiske aktivitetar og prosessar i lag med barn og kollegaer i barnehagen (vekting 50%).
• Mappeelement 3 syner studenten sin refleksjon over utvikling av eigen profesjonsfagelege digitale kompetanse gjennom valfrie modaliteter (vekting 20%).

Karakterskala A-F, der F svarar til ikkje bestått.

Ved ikkje bestått kan det leverast forbetra versjon av mappa til ny eksamen.

Hjelpemiddel ved eksamen

Alle hjelpemiddel er tillate. Eksamensbesvarelsen må ha verkshøyde jfr. Lov om opphavsrett til åndsverk (https://snl.no/verkshøyde )

Meir om hjelpemiddel