PLA851 Berekraftig klimatilpassing i arealplanlegging

Innhald og oppbygging

Emnet kombinerer kunnskap om klimatilpassing med praktiske oppgåver knytt til arealplanlegging. Verkstader og øvingar er viktige gjennom heile kurset, og tilbyr verdifulle planleggingsrelevante erfaringar. Heile emnet er utforma med tanke på at studenten skal vurdere klimarisiko og utvikle ei heilskapleg og berekraftig løysing for klimatilpassing i ein lokal kontekst etter studenten sitt eige val, for deretter å drøfte den opp mot faglege normer og standardar.

Det teoretiske grunnlaget for emnet tek for seg plansystem, drivarar for og dynamikkar i endring av arealbruk og utforming, og samfunnsmessige og institusjonelle eigenskapar som påverkar evne til å handtere klimaendringar. Dette gir grunnlag for kritisk refleksjon over ulike klimatilpassingsstrategiar, korleis samfunnsmessige faktorar påverkar klimarisiko, og samanhengar mellom klimatilpassing og utsleppsreduksjon.

Emnet har eit yrkesretta fokus, og gir også perspektiv på plansystem i ulike land. Ekskursjonar og feltdagar vil gi innsikt i kva som må til for å oppnå heilskapleg planlegging, og er meint å gi nødvendig bakgrunn for å fullføre dei praktiske delane av emnet.

Emnet blir undervist på engelsk.

Læringsutbytte

Kunnskapar

Studenten har

• avansert kunnskap om sentrale omgrep innan og tilnærmingar til klimatilpassing i forsking og praksis
• forståing for korleis samfunnsmessige og institusjonelle faktorar og kontekstar påverkar klimarisiko
• avansert kunnskap om fordelar og ulemper knytt til ulike alternativ for klimatilpassing verda rundt
• forståing for samanhengar mellom klimatilpassing og tilsvarande globale og lokale mål for planlegging, i samsvar med FN sine berekraftsmål
• forståing av eigenskapar og verkemåtar for ulike plansystem

Ferdigheiter

Studenten kan

• utføre verknadskjedeanalysar for lokal klimarisiko
• identifisere ulike alternativ for lokal klimatilpassing basert på verknadskjedeanalysar
• utvikle berekraftige løysingar for klimatilpassing lokalt
• søke opp og velje ut relevant litteratur for å vurdere alternativ for klimatilpassing
• analysere og drøfte heilskaplege løysingar for lokal klimatilpassing i lys av gjeldande teoriar og forsking

Generell kompetanse

Studenten kan

• planlegge og gjennomføre analysar og prosessar med mål om å redusere klimarisiko
• delta i samproduksjon av kunnskap om klimaspørsmål i tverrfaglege og internasjonale grupper
• presentere og diskutere, munnleg og skriftleg, komplekse spørsmål på tvers av vitskaplege grenser
• gi og handtere konstruktiv tilbakemelding på skriftlege og munnlege presentasjonar

Krav til forkunnskapar

For opptak til emnet må du ha bachelorgrad, eller tilsvarande grad i naturvitskap, samfunnsvitskap, teknologi eller ingeniørfag med minimum 80 studiepoeng i:

• Miljøvitskap
• Politikk, forvalting, planlegging
• Grøn teknologi og omstilling
• Geovitskap og naturfarar

eller ein kombinasjon av desse fagområda

Samla karakter på grunnutdanninga må vere C eller betre

Undervisnings- og læringsformer

• Arbeidsverkstader
• Seminar og ekspertpanel
• Gruppe- og plenumsdiskusjonar
• Forelesingar
• Ekskursjon/Feltdag
• Oppgåveskriving og rettleiing

Obligatorisk læringsaktivitet

• Godkjent deltaking på 3 fysiske samlingar à 3 dagar
• 2 godkjende innleveringar med medstudentrespons

Dei obligatoriske aktivitetane må vere godkjent for at du skal få tilgang til å levere oppgåva som er avsluttande eksamen i emnet. Dersom du er forhindra frå å delta på delar av dei obligatoriske samlingane, så kan du søkje om å få tilrettelagt for eit alternativ.

Vurderingsform

Individuell prosjektoppgåve.

Karakterskala: A-F, der F er ikkje bestått.

Hjelpemiddel ved eksamen

Alle

Meir om hjelpemiddel

Fagleg overlapping

• PL4-304 - Climate adaptation in spatial planning - Reduksjon: 10 studiepoeng