Eline Lundervold
Rådgivar
Avdeling for kommunikasjon

14 arbeider fekk tilslag på kunstfaglege forskingsformer

I 2023 gjennomførte FLKI sin første fagfellesvurdering av dei tilsette sine kunstfaglege forskingsarbeid. Retningslinjene for KFF blei vedtekne av dekan etter behandling i ID-møtet 29. august.

Eit viktig steg for kunstfagleg forsking 

Den nye KFF-ordninga har stor betydning for kunstfaga ved HVL. Dette anerkjenner den kunstnariske forskinga på lik linje med tradisjonell forsking og utviklingsarbeid, og opnar for meir praksisnær og profesjonsretta forsking, fortel administrativ leiar for komitéen Tiri Beate Bergesen Schei.   

– Dokumentasjonsformene blir meir varierte, og vi kan nå eit breiare publikum. Vi ser fram til å utforske endå meir gjennom fleire moglegheiter og dele våre funn med eit breiare publikum. 

Intern og ekstern komité  

Den eksterne KFF-komitéen er professor Ann-Hege Lorvik Waterhouse (USN), professor Eirik Askerøi (HINN) og dosent Anne Eriksen (UiT). Professor Tiri Beate Bergesen Schei (HVL) er leiar for forskingsprogrammet Kunst, kreativitet og kulturelle praksisar og fungerer som administrativ leiar for komitéen.  

Komitéen har merka seg at godkjende arbeid held svært høg kvalitet. Dette er ei anerkjenning av kunstfagleg arbeid som ikkje har vore synleg i FLKI sitt tellesystem tidlegare. No er det det, og alle godkjende arbeid vil få utteljing i form av poeng, på same linje som NVI-systemet.  

Det var altså 14 arbeid som fekk tilslag. Dei kunne søke med arbeid som gjekk tre år tilbake i tid, sidan dette var første gongen. Frå no av er det kunstfaglege forskingsarbeid som er gjort siste året som kan meldast inn til fagfellesvurdering. Poenga tilfall forskargruppa som den tilsette høyrer til, og blir lagt til grunn i ressursberekninga ut frå gjeldande modell for utrekning av ressursar til forskargrupper ved FLKI.  

I tråd med oppdraget vårt 

Høgskulen på Vestlandet har eit særleg ansvar for å dele forsking og kunstnariske forskingsprosjekt. Tildelingsbrevet frå Kunnskapsdepartementet for 2024, og Universitets- og høgskulelova slår fast at universitet og høgskular skal bidra til å spreie og formidle resultat frå forsking og fagleg og kunstnarisk utviklingsarbeid. KFF-ordninga er eit viktig bidrag for å oppfylle samfunnsoppdraget til høgskulen, óg for framtida.  

Leik med leire  

Eitt av kunstarbeida som fekk tilslag er LeiKre - ei kollektiv utforsking i leire. I LeiKre utforskar barn og vaksne leire der prosess og kollektivitet står sterkare enn resultatet.  

last ned (3).jpg Frå LeiKre under Småspill på HVL mai 2023. 

– Gjennom prosjektet har vi oppdaga at å legge til rette for utforskande prosessar, der borna får bruke heile kroppen sin og ha tilgang til rikeleg med materialar, er eit godt utgangspunkt for utforskande praksisar i barnehagen og i barnehagelærarutdanninga, seier høgskulelektor Gro Merete Eide.  
 
Komitéen trakk særleg fram LeiKre sin tilnærming til samskaping, der det er lagt til rette for utforsking og eksperimentering saman med barna. Lang erfaring og utdanning innanfor leire har gitt innsikt i materialet og korleis det kan nyttast i kunstnarisk forsking. Ingrid Skarprud var engasjert i LeiKRe som høgskulelektor, og no stipendiat i BARNkunne. Ho fortel at møte med leire danna grunnlaget for prosjektet. Etter kvart utvikla det seg til å inkludere barna direkte og ende opp som ein del av Festspillene gjennom Småspill. 

– Vi var nervøse, men òg spente på tilbakemeldingane frå komitéen om arbeidet. Dette prosjektet var nytt for oss og har aldri tidlegare blitt utforska på denne måten. Vi har ikkje berre samla erfaringar, men òg sett korleis barn utviklar seg i samhandling med både andre barn og vaksne, seier Skarprud.  

last ned (4).jpgLeirkasting på stort lerret. 

last ned (5).jpgProduksjon av utforskande barn på småspill. 

For barnehagar som ønskjer å utforske liknande arbeid i si kvardag har Eide og Skarprud nokre konkrete tips. Legg til rette for kroppslege og utforskande prosessar der barna får bruke heile kroppen sin, utan å ha klare mål om eit sluttprodukt. Gi dei tilgang til materialar og stor plass, og la dei vera delaktige i prosessen.   

Nyttige lenker: 

  •